中式滾湯 - 蕃茄薯仔湯

蕃茄薯仔湯係我屋企成日都會煮既野, 因為簡單快手又好味~ 平時晚餐有啖湯, 感覺都好d架!

材料亦都非常基本:
4-6個蕃茄 (睇大細)
1個大/2個細 薯仔(如果鐘意食可以落多D)
150g 牛肉 (用生抽同糖醃左先, 另可用豬肉代替, 免治/肉片皆可)
2L 水

首先我會煮滾水, 同時間蕃茄去草頭切粒(越細越好, 越易出味, 我通常1個細蕃茄會開16粒), 一路切, 一路放入已有滾水既鍋入面.

薯仔去皮切粒, 薯仔要小心氧化, 唔好比薯肉接觸空氣, 我會先切一厚片, 快手去皮切粒(我唔鐘意太大舊, 每粒既size大概係一個膠樽汽水蓋咁上下), 放入湯, 再切第2厚片, 再快手去皮切粒, 再放入湯. 如果你係去晒皮先(特別係2隻既話), 唔係切緊個陣就要用水浸住先.

d湯煲大概30分鐘就可以加埋牛肉落去, 再煲多陣就可以落鹽飲得啦!

另外, 如果你想再多d料, 可以加埋甘筍, 洋蔥, 西芹, 椰菜等. 有時買左d生雞脾, 咁起肉之後會淨左d雞骨, 依個時候就可以拎去出水, 放埋落去一齊煲(一開始就落, d骨係煮得越耐越好!)!